عشــان أنبهكــم يابنات وأبرّي ذمـــــتي .. ~

[مشكلتيـ عربجيـه]

بسم الله الرحمن الرحيم
اتمنى من الكل يقرون هالموضوع لانه كثير مهم عشان البنات ينتبهون لانفسهم والشباب يحذرون خواتهم واهاليهم ..
انا القصه هذي صارت معي وربي شاهد على كلامي ولا ازل عليكم بكلمة ..
بالبدايه كنت بفتره تجهيزي لزواجي وشي طبيعي كنت شبه يوميا بالسوق المهم لما رحت اجيب المكياج دخلت واحد من المحلات المعروفه بهذاك السوق اللي رحتله .. المهم كنت لاهيه بالمكياج والمحل فيه اكثر من بياع وهم من الجنسيه اليمنيه المهم وانا لاهيه كانت امي بعيده عني شوي بس بنفس المحل كان قدامي واحد بس وانا بطبعي على نياتي مع كل الناس واعاملهم بإحترام كبير وهذا غلط مني ماتصورت ان فيه بشر من النوعيه الحقيره اللي بتشوفونها الحين ..
المهم لما خلصت قلتله كم حسابي قال لي طيب ماشفتي الكريمات والعطور الجديده بس تلقينها عندنااا ..
قلتله والله ماجيت عشان العطور خلاص شريت بس ابي المكياج ..
قال لاااا انتي زبونتناااا ولازم تشوفيها تراها مطلوبه عند المتزوجين يعني مرره حلوه
قلتله طيب هات اشوف<< غلطتي اني جاملت ..
المهم ماسويت شي غلط وشكلي ولله الحمد محترمه وعباتي ساتره وكل شي بس اللي فيه ريح مايستريح .. قال شمي هذا .. شميته عادي الا بايخ ..
قلتله ايه طيب وغيره .. بسرعه مستعجله قال لا تعالي شمي هذا .. شميته , قلتله عادي بس والله بطلع بعدين اشوفها , قال طيب ماتحسين بشي ؟انا استغربت ..
قلتله وشو يعني .. تخيلو قال لي انتي مايكفيك ثنين تعالي طيب شمي هذا تراه يجنن
بس انا حسيت شوي اني بديت اضيع بس صاحيتله ابن الحرام قلتله لااا مابي هو شكله حس فيني اني بديت ادوخ .. قال: وهو موطي صوته .. افتحي صدرك شوي .. محد يشوفك افتحيه شوي خل اشوف بس شوي ..انا انهبللللللللللت فهمت توني استوعب وربي ماتوقعت يصير كذا لهالدرجه حقاااره
قلتله ياحقير هذي آخرتها حسبي الله عليك هو خاف
:icon28:

قال الله يخليك لاتزعلين خلاص مابي شي ...
وطبعا انا استوعبت انه شممني العطور هذي فيها شي وحده قد قالتلي ان فيه عطور تنباع بالخفى حقت الإثاااره حقت المتزوجين والله ماعمري شميتها بس سمعت عنها المهم لاني كنت بحاله زي الدوخه كذا طلعت على طول ولا قلت لامي بصراحه وقتها خفت وطلعنا من السوق
والله ماصحصحت الا لما وصلت للبيت بس قسم بالله مقهووووره كثير مو بس على اللي سواه فيني مقهوره انه لايكون سوا هالحركه مع غيري اوبنات مراهقات مايدرون وش يسوون آه قسم بالله ضاق صدري حرق قلبي شعور مااقدر اوصفه واحد قذر و*** ماتربى ..
:icon28:.
انا قلت هالموقف عشان احذركم يابنات وأبري ذمتي:icon26:



وسامحوني طولت عليكم بس موبيدي الا اني اانبهكم ممكن تصير بأي وحده فيكم الله يستر على بنات المسلمين أجمعين وانتو ياشباب حذرو خواتكم لان الوحده ممكن بعد ماتشم هالعطور تسوي اشياء وهي بغير وعي منها .. اللهم احفظنا يااارب العالمين .. قولو آمــــــــــين:icon26:

وأنا عند ربي صادقه واقسم قسم ان هالشي صار والله على ماقلته يشهد ..

[ملاك بعيونه]

جزاك الله خير

الله يسعدك دنيا و آخره

فعلا هذي الاشكال منتشرة كثير في الاسواق

الله يستر على بنات المسلمين و يكثر من امثالك

[مشكلتيـ عربجيـه]

رورو الله يجبر بخاطرك انتي بس اللي رديتي علي وبأحلا كلام يرفع المعنويات فديتك الله لايحرمني طلتك حبيبتي

[هـتـلـر]

مشكورشيشن ..

[خاطرة مبدع]

ياعربجيه يعطيكي ألف عافيه على التحذير الهام
وهذه طريقه جميله انك تنبهين الغافلين
ولكن ..
من ألافضل أيضاً انك تبلغي عن هذه الفئه من ضعيفي النفوس
الذين أفسدوا بناتنا ونسائنا.
بأعتقادك كم من المرات قد جربوا هذه التجربه من قبل,
والأدهى والأمر كم مره جربوها بعدك,
وأنتي ياأختي وغيرك الكثير من بناتنا قد ساعدتموهم بالاستمرار في فسادهم .
كيف ,,
بسكوتكم المستمر وأخفاء الامر وعدم ألافشاء بهم حتى ينالوا جزائهم,
والمهم هو الحد من أنتشار الفساد وانحلال الاخلاق في مجتمعنا.
قضيه التستر وعدم أبلاغ الشخصي بهذه الفئه من المفسدين هو مايساعدهم
على الاستمرار في طرقهم للفساد ولهتك عفّه النساء,
وهذه هي القضيه الأهم والاخطر.

أشكركي أختي على طرح هذه القضيه الخطيره
والحساسه.

وتقبلي مروري,,
خاطرة مبدع,,

[اسمر]

مشكلتي عربجية


دهشت لما نقلتي اختي ولكن في الحقيقة لا بد أن نأخذ الحذر من هؤلاء الباعة الذين يكون كل همهم اصتياد بناتنا

اختي عربجية

تمنيت من صاحبة الواقعة وكل من تمر بنفس الموقف او ما شابهه أن تبلغ الهيئة فهي المتصدي الاول لمثل هؤلاء الحثالة

حماك الله وكل بناتنا من هؤلاء الشرذمة


ودي ووردي


اسمر بطعم الجلاكسي

[مشكلتيـ عربجيـه]

لكل من رد على موضوعي الله يعطيكم الف اللفففففففففففففففففففففف عافيه وربي ودي ابلغ عنه بس قسم بالله كن شي يردني عنهم وهو لايزال بنفس المحل ماراح وانا عن نفسي معد ادخل محلهم ابببببببد
الله يحمينا من شرهم..

[حالمة]

جزاك الله خير أختي مشكلتي عربجية على التنبيه

كان من الأفضل أن تبلغي بالبداية ولي أمرك الذي كان معك بالسوق

ثانياً وهو الأهم التبليغ عن المحل وصاحبه لإدارة السوق وإثبات الواقعة

ثالثاً إذا لم ينفع معك الحل الأول والثاني استخدمي الحل الثالث ألا وهو تبليغ الهيئة

وإن استطعتي أن تحذري صديقاتك وأقاربك من هذا المكان يكون أفضل حتى لا يقعوا بنفس الموقف الذي مريتي به

شاكرة لك طرحك المميز مشكلتي عربجية

نقلتي ماحصل لك بكل تفاصيله وكان نقلاً حياً ومطابق لبعض المواقف التي نواجهها في حياتنا ولكن بدون أخذ موقف

منها سوى تجاهل الموضوع وأنها مرت بسلام

تقبلي مروري المتواضع وردي

[مشكلتيـ عربجيـه]

جزاك الله خير ياقلبي حلوووم

بس وربي كان فيني خوف غير عادي

وربي ماادري وش اقول

ردي عليك متأخر بس قلت خل ارد الحين عشان يقرونه البنوتات الجدد اللي معنا بالمنتدى عشان ينتبهون

اللهم احفظنا من كل شر

[غريب الدار]

شاكر لك ع التنبيه

واضم صوووتي لــ خاطرة مبدع وو اسمر

كان يتووجب عليك الابلاغ سوآ الهيئه

اوو رجال الامن ** الشرطه **

كان مووووقفك شجاع لاكن وش راح يكوون موووقف غيرك

الله احفظ امهاتنا واخووواتنا وبناتنا وامن روووعاتنا واستر عوووراتنا

دمتي كما انتي بنقاء قلبك

خالص التحايا واصدقها

غريب الدار

[مشكلتيـ عربجيـه]

والله يااخوي ياغريب كلما رحت للسوق وشفته بالمحل حقهم اني ادعي عليه واخاف امر من جمبهم احس بكره كبير اكرهه

حسبي الله ونعم الوكيل

عموما انشالله اني اببلغ عنه واريح ضميري

مشكور ياغريب ع المرووور

الله يحفظ كل من يعز عليك ويستر عليهم

[تناهيد الغرام]

جزيتي مليون عافيه ع التنبيه وربي شئ مخجلهالتصرف الغبي الله يحمينا ويستر ع جميييع بنات المسلميين بس للأسف من هالنوعيه كثييير وانا وحده من الي ماعندها جرائه التبليغ لكن حبيبتي سوي الي تقدرين عليه ربي يعافيك ويسلموووو يالغلا

[مشكلتيـ عربجيـه]

يسلمك ربي من عذابه وعسى الله يحميك من كل شر يالغاليه

[××خواطـرشـوق××]

غاليتي مشلكلتي كلي شكرر وتقدير لنقلك الهام

انا عن نفسي لااثق في مثل هؤلاء الباعه

ولااحب ان اجازف في كل مشتروياتي وحاجياتي

حماناالله واياكي من شرهم وكيدهم



خالص التحايا..

[مشكلتيـ عربجيـه]

حسبي الله عليهم
كيف نقدر نستغني عن المحلات كيف نشتري حاجياتنا
ملزومين ندخل بس من بعد هذي لازم ننتبه ومانثق بأي احد


فديتك حزينه
شاكره مرورك ودعوتك لي يالغاليه

[ღغــــربة مشاعــــرღ]

لاحول ولاقوة الا بالله

الله يحفظك اختي ويحفظ بنات المسلمين